- 1 -

زيَارَة فـُجْئِيَّة وخْفِيفـــة *** لجُمْهُوريّة شـِيخْ تـْحِيفـَة [1]

تـْحِيفـَة جَانَا فـُوقْ دَبَّابَة *** جَمَّعْهَا ودَارْ المِيثــَاقْ [2]

قال يـِزِّي مِنْ حُكْمِ الغَابـَهْ *** شـَعْبـِي يُحْكُمْ باسْتِحْقـَاقْ

لا فـَسَادْ وسِرْقـَة ونـَهَّابـَا *** ولا حكـُومَهْ فِيهَا سُــرّاقْ

لا تْخَلـِّي ِلمْكـَشَّرْ نـَابَـا *** لِلْحُريَّه شَعْبـِي مِشْتـــَاقْ

كِغَوِّلْ وِنـْشَرْ كْلاَبــــَا *** كـَبِّشْ في الكـُرْسِي عَشَّاقْ

تـَفـَصِّلْ في الدُّسْتـُورْ ذيَابَا *** كِسْوَهْ على قـَدُّو يا رفــَاقْ

تـنَاشِدْ في تـْحيفـَه الكذابـَا *** مَسْرَحِيّهْ قدِيمَهْ سْخِيفـــَهْ

زيَارَةْ فـُجْئِيّة وخْفِيفـَة
لجُمْهُوريّة شـِيخْ تـْحِيفـَة

- 2 -

يا مشَاركْ في الرئاسيّهْ [3] *** تنشّطْهَا الانـْتِخَابَـــاتْ [4]

زَوَاجْ المُتْعَهْ مَعَ الفـَاشِيّهْ *** بَايـِعْ شَعْبـِكْ عَ الشِّيكَـــاتْ

تهَادِنْ فِي سَياَسِة بـَانْدِيّـهْ *** ترَجَّعْ في عَهْدِ البَايَــــاتْ

الشـِّيخْ تـْحِيفـَهْ ولـَلاَّ بَيَّهْ *** هَنـَاشِرْ وقصُورْ وَشِيخَـاتْ

نَهْب وسِرْقـَهْ وبَلـْطَاجِيّـهْ *** وهَذِي دولة اِمْسَحْ مَــاتْ

الزَوَّالِي عَايِشْ فِي السَّيَّـهْ *** مَقـْهُورْ وَزَادُوهْ سْكـَــاتْ

مَرْتُو صَرْخَهْ زَوّاليـــّهْ *** قدّاشْ المَعِيشـَة غـــلاتْ

وَاشْ تِكْفِي هذِي الشّهْرِيَّهْ *** قـُرَايَة ولِبْسَة ودْوَايَــــاتْ

وَزِيدُوهَا بطَالَة ذِرِّيَّـــا *** مِنِيـــــنْ نِخَلِّصْ لِكْرَاوَاتْ

لاَ كَرْنِي لا يِصُبُّوا عَلَيَّـا *** لا طـُبَّة ولا سْبِيطَــــارَاتْ

وَيَا مَشَارِكْ [5] نَعْطِيكْ وَصِيَّهْ *** تَحْتِ الرَّبْوَة كَلاَبْ الجِيفَـة

زيَارَة فـُجْئِيّة وخْفِيفـَة
لجُمْهُورِيّة شـِيخْ تـْحِيفـَة

- 3 -

يَا مْشَارِكْ فِي التَّشْرِيعِيَّهْ [6] *** تنـَشِّطْ فِي سيَــاسَة القصَرْ

أحْزَابْ السُّلـْطَة الإدَارِيَّهْ *** جَرِيدَة وَدَزَّهْ وَمَقـَرْ

بَرْلـَمَـانْ وَمَسْرَحِيَّهْ *** كشِفْنَاهَا وعَرَفـْنـَا السِّـــــرْ

تِتْعَيِّنْ مِ الدّاخِلِيّـــــهْ *** قـَوَّادَهْ فِي العَارْ تكــُرْ

تبـِيعْ تسَمْسِرْ بالحُــريَّهْ *** والكـَادِحْ زِدْتـُوهْ المُــــرْ

تـَلـْسَعْ فِي تُونِسْ كِالحَيَّهْ *** حَيَاةْ شَعْبـِي وَلـِّتْ في خطَـرْ

طـَامَعْ في دَارْ وشَهْرِيّـهْ *** تَيَّاسَة في الذِلّ تكُــــــرْ

لِلْخَضْرَاء نِكْتِبْ بَرْقِيّــَة *** لا تنَخِّبْ يا شَعْبِي الحُــــرْ

لِمْقـَاطِعْ [7] للشَّعْبِ ثـنِيّة *** فِكْرو قـَمْرَا ويدُّوا نظيفـَـــة

زيَارَة فـُجْئِيّة وخْفِيفـَة
لجُمْهُورِيّة شـِيخْ تـْحِيفـَة

- 4 -

لِمْقـَاطِعْ يِبْنِي الحُريَّـــة *** ولا يهادِنْ هالدِّكْتَاتُــــورْ

مَا يرَاهِنـْشِي عَ الفـَـاشِيَّة *** ولاَ يَلْعِبْ لِعْبَة دِيكـُـــورْ

لا يسَمْسِرْ ولا يِدِيرْ السَّيَّـه *** لا يشَـــارِكْ وِنَخِّبْ زُورْ

يِرَاهِنْ عَ الشُّعُوبْ ثَنِيَّــة *** تَقضِي عَ الظُّلاَّمْ تثـُـــورْ

تِبْنِيهَا سَيَاسَة شَعْبِيَّــــة *** ولا تخَلـِّي وَاحِدْ مَقـْهُــورْ

مَاهِيشِي عَ الشَّعْب وَصِيَّة *** لا تِسْرِقْ تِنْهِبْ البُــــرورْ

ولا تِخَلـِّي بَلاَيِصْ مَنْسِيَّة *** الخَضْرَاء الكُلْ توَلِّي بــدورْ

لاَ رَشْوَة وَلاَ مَحْسُوبِيَّــة *** ومَا عَادِشْ لِكْتَـــافْ اِدُّورْ

لاَزَطْلَة وعِيشَة وَهْمِيّـَة *** ولاَ حَرْقـَة وَبَطُّو وبُحُــــورْ

ولاَ قـرَايَة بالبُولِيسِيَّـة *** يُسْكُنْ وِيدَاوِي مَسْتـُــــورْ

يُرْسُمْهَا فـُنـُونْ بحُريَّة *** ولا يعيش المُبْدِعْ مَقهُــــورْ

وَمَا يِخَلِّي المَرْأة مِنْسِيَّة *** تشَارِكْ وتقرِّرْ وتْثـُــــورْ

يِسَطِّرْ شَعْبِي المَسْؤُولِيَّة *** يِحَاسِبْ وِيحَاكِمْ لِغُــــــورْ

سِيدْ بْلادُو باسْتِحْقاقْ *** ما يِخَافِشْ عَايِشْ في النـّـُورْ

وَيَا شَعْبِي اِفهِمْ لِبْرَيَّـهْ *** مَا تشَارِكْ وِانْتَ مَقـْهُــــورْ

قـَاطِعْ هَاذي المَسْرَحِيَّه *** وخَلِّيهَا ضبُوعَا مــــعَ جيفَة

زيَارَة فـُجْئِيّة وخْفِيفـَة
لجُمْهُورِيّة شـِيخْ تـْحِيفـَة

عادل المسعودي